الفرق بين نظام الجرد الدوري والمستمر
الفرق بين نظام الجرد الدوري والمستمر
كتير مننا راح مقابلات واتسال السؤال المتكرر المقرر علينا في كل مقابله وهو ايه الفرق بين معالجة المخزون في ظل نظام الجرد الدوري ونظام الجرد المستمر وكتير مننا عارف اجابة السؤال وبيجاوبه بس في جزء بسيط ميعرفش الفرق ده فايه رايكو لو نحاول نشوف ايه اهم الفروق بين النظامين ومعالجتهم المحاسبية؟
خلينا نبدا بنظام الجرد المستمر او عشان اللي درسه بالانجلش هو الperpetual inventory system
في النظام ده بيكون عندي حساب اسمه حساب المخزون وبيتحمل معايا بكل حركة من حركات المخزن سواء صرف او اضافة يعني لو اشتريت بضاعة ودخلتها مخزن بيزيد عندي حساب المخزون ولو بعت بضاعة بينقص وبالتالي اقدر اشوف رصيد الحساب ده في اي وقت واعرف قيمة المخزون اللي عندي في المخزن وممكن كمان اعمل جرد واطابق الرصيد الفعلي بالرصيد الدفتري وبكده بيكون عندي رقابة احسن علي حساب المخزن
طيب نيجي للقيود دلوقتي لو اشترينا بضاعة او بيعنا حيكون القيد ايه؟؟
عند شراء البضاعة يعني ضفت للمخزن يعني المخزون زاد ولاننا عارفين ان المخزون طبيعته اصول متداولة وان الزيادة في الاصول بتخلي حساب الاصل مدين يبقي القيد حيكون
من ح / المخزون
الي ح/ المورد او النقدية او البنك حسب طريقة السداد
طيب وعندالبيع من المخزون او الصرف يعني المخزن حيقل يعني حيبقي داين في الحالة دي بعمل قيدين قيد لصرف المخزون بتكلفه البضاعة وقيد تاني للمبيعات بسعر البيع طيب يلا نشوف القيود؟
عند البيع والصرف من المخزن ححمل ح / تكلفة البضاعة المباعة بقيمة البضاعة اللي اتصرفت و بقلل ح / المخزن بالتكلفة فبقول
من ح/ تكلفة البضاعة المباعة
الي ح / المخزون
وباجي بعمل قيد مبيعات بقول فيه
من ح / العملاء او النقدية او البنك – حسب طريقة السداد
الي ح / المبيعات--- وطبعا القيد ده بيكون بسعر البيع مش بالتكلفه
وبكدة في اي لحظة في السنة بقدر اعرف رصيد المخزون عندي كم
طيب كفاية كده مخزون مستمر ونروح للمخزون الدوري او ال
Periodic inventory system
في النظام ده مبيظهرش عندي حساب المخزون وبيظهر عندي حساب المشتريات عند الاضافة للمخزن فاي بضاعة بشتريها بقولمن ح/ المشتريات
الي ح/ المورد او البنك او النقديه – حسب طريقة السداد
طيب وعند الصرف؟ اعمل ايه؟؟؟
في الصرف بعمل قيد واحد بس للمبيعات ومبنقصش المخزن بتاعي بعكس نظام الجرد المستمر يعني بقول قيد بس
من ح/ العملاء او النقدية او البنك
الي ح / المبيعات وشكرا على كده هو قيد واحد
طيب وتكلفة البضاعة المباعة ؟؟ ححسبها ازاي؟
تكلفة البضاعة المباعة في النظام ده لاني مبعملش قيد صرف فمبتتحملش بقيمه المخزون اللي اتصرف من المخزن لكن بحسبها عن طريق اني بشوف رصيد المخزن في بداية الفترة كن كم وهو نفسه رصيد نهاية الفترة من الجرد للسنه اللي فاتت وبضيف عليه مشتريات السنه وبخصم منهم رصيد المخزن الفعلي من جرد السنة دي
يببقي بقول
تكلفة البضاعة المباعة في نظام الجرد الدوري = رصيد مخزون اول + مشتريات – رصيد مخزون اخر
طيب اللي حييجي في دماغنا لو الراجل امين المخزن ده سرق من المخزون حنكتشفه ازاي؟؟
والاجابة للاسف صعب تكتشف السرقة لان معندكش رصيد للمخزون اصلا ولو في سرقة حتتحمل علي تكلفه البضاعة المباعة لان حتعتبر منصرف من المخزن اصلا حسب المعادله
طيب ناس حتقول طيب انا استخدم النظام العقيم ده ليه؟؟
والاجابه ان النظام ده ممكن يستخدم لو طبيعة البضاعة اصلا قيمتها صغيرة وصعوبة التلاعب فيها زي مثلا مخزن رمل او خضراوات او اي حاجه من الطبيعة دي
تعليقات
إرسال تعليق